आर्थिक वर्ष २०८२/०८३ को वार्षिक स्वास्थ्य कार्यक्रम समीक्षा

स्वास्थ्य कार्यालय, झापाको आयोजनामा आर्थिक वर्ष २०८२/०८३ को वार्षिक स्वास्थ्य कार्यक्रम समीक्षा कार्यक्रम दुईदिने कार्यक्रमका रूपमा सम्पन्न भयो। कार्यक्रममा जिल्लामा सञ्चालित विभिन्न स्वास्थ्य कार्यक्रमहरूको प्रगति, उपलब्धि, समस्या तथा चुनौतीहरूको समीक्षा गर्दै आगामी कार्यदिशा र सुधारका उपायहरूबारे विस्तृत छलफल तथा अन्तरक्रिया गरिएको थियो।

कार्यक्रमको अध्यक्षता स्वास्थ्य कार्यालय, झापाका प्रमुख श्री बृजकुमार दासले गर्नुभएको थियो। कार्यक्रममा जिल्ला समन्वय समिति, झापाका प्रमुख श्री विश्वनाथ बराल, प्रमुख जिल्ला अधिकारी श्री शिवराम गेलाल, प्रदेश स्वास्थ्य मन्त्रालयका श्री सभ्यता पन्थी र श्री रूपनारायण यादव, प्रदेश स्वास्थ्य निर्देशनालय, धनकुटाका श्री अनिल प्रधान, प्रदेश अनुसन्धान तथा प्रशिक्षण प्रतिष्ठानका श्री चुडामणि लुइँटेल लगायतको उपस्थिति रहेको थियो। साथै, झापा जिल्लाका विभिन्न स्थानीय तहका स्वास्थ्य शाखाका प्रतिनिधिहरू तथा दर्ता भएका सरकारी एवं निजी स्वास्थ्य संस्थाका प्रतिनिधिहरूको सक्रिय सहभागिता रहेको थियो।

कार्यक्रमको शुभारम्भमा खोप अधिकृत श्री राजकुमार पोखरेलले स्वागत मन्तव्य व्यक्त गर्नुभएको थियो। कार्यक्रमको सहजीकरण तथा सञ्चालन श्री विश्वनाथ श्रेष्ठ, श्री रोजिना दाहाल र श्री विद्या न्यौपानेले गर्नुभएको थियो।

दुई दिनसम्म सञ्चालित कार्यक्रममा विभिन्न स्वास्थ्य कार्यक्रमहरूको वार्षिक प्रगति तथा उपलब्धिको प्रस्तुतीकरण र समीक्षा गरिएको थियो। स्वास्थ्य सेवा प्रवाह, कार्यक्रम कार्यान्वयनको अवस्था, लक्षित समूहसम्म सेवाको पहुँच, तथ्याङ्क व्यवस्थापन, उपलब्ध स्रोत-साधनको उपयोग तथा कार्यक्रम कार्यान्वयनका क्रममा देखिएका समस्या र चुनौतीहरूबारे सहभागीहरूबीच छलफल गरिएको थियो।

स्थानीय तह तथा स्वास्थ्य संस्थाका प्रतिनिधिहरूले आ-आफ्ना क्षेत्रका उपलब्धि, सिकाइ, समस्या तथा सुधार गर्नुपर्ने पक्षहरू प्रस्तुत गरेका थिए। छलफलका क्रममा स्वास्थ्य कार्यक्रमलाई थप प्रभावकारी, गुणस्तरीय र परिणाममुखी बनाउन अन्तरनिकाय समन्वय तथा सहकार्य, तथ्यमा आधारित योजना निर्माण, नियमित अनुगमन तथा मूल्याङ्कन, तथ्याङ्कको गुणस्तर सुधार र प्रभावकारी स्वास्थ्य सेवा प्रवाहमा जोड दिइएको थियो।

समग्रमा, कार्यक्रमले जिल्लाको स्वास्थ्य क्षेत्रको प्रगति तथा उपलब्धिको समीक्षा गर्नुका साथै आगामी दिनमा सुधार गर्नुपर्ने क्षेत्र पहिचान गरी प्रभावकारी कार्यदिशा तय गर्न महत्वपूर्ण अवसर प्रदान गरेको छ। सहभागीहरूबाट प्राप्त सुझाव, अनुभव तथा सिकाइलाई आगामी स्वास्थ्य कार्यक्रमको योजना तथा कार्यान्वयनमा उपयोग गर्ने प्रतिबद्धतासहित कार्यक्रम सम्पन्न भएको थियो।